النهاردة هنتكلم بصراحة عن حاجة بتخوف كتير مننا وهي الانتكاسة.
أول حاجة عايز أقولها: الكتاب المقدس. بيقول بوضوح: الصديق يسقط سبع مرات ويقوم (أمثال ٢٤:١٦). الآية دي ما بتقولش إن السقوط مش هيحصل، بتقول إن اللي يقع يقوم.
وكمان الانتكاسة مش بتيجي فجأة. ليها أسباب، والأسباب دي ممكن نتعلمها ونتجهز ليها. وإحنا هنتعلم من ناس في الكتاب المقدس وقعوا، وفهموا إيه اللي وقعهم، وربنا رجعهم.
٦ أسباب للانتكاسة
١: الثقة الزايدة
إيه اللي بيحصل؟ الواحد يقعد شهور أو سنين متعافي، فيحس إنه بقى كويس وماسك الموضوع. يبدأ يستهون بالمتابعة والجلسات ويقول: مرة واحدة مش هتفرق.
شمشون (قضاة ١٦). شمشون كان أقوى راجل في زمانه، وكان عارف إن قوته من ربنا. بس استهان بيها. راح ورا دليلة مرة ورا مرة، وفي الآخر فقد قوته، وقضاة ١٦:٢٠ بيقول: ولم يعلم أن الرب قد فارقه. يعني القوة راحت وهو مش واخد باله.
وبرضه الحكاية ما خلصتش على كده. شمشون صلى في آخر حياته ورجع لربنا، وربنا أعاد له قوته (قضاة ١٦:٢٨).
لكن في وقاية: من يظن أنه قائم فلينظر أن لا يسقط (كورنثوس الأولى ١٠:١٢). ما توقفش المتابعة حتى لو حاسس إنك كويس. الثقة الحقيقية إنك تعرف إنك محتاج دعم.
٢: التعب والجوع والغضب والوحدة
في التعافي بيقولوا الأربعة دول أخطر حالات: جعان، غضبان، وحيد، تعبان. لما تجتمع أو واحدة منها تقوى، الدفاعات بتضعف.
نشوف مثلا إيليا (ملوك الأول ١٩). إيليا كسب معركة كبيرة قدام الناس كلها، وبعدها بيوم جري من إيزابل وقعد تحت شجرة وقال: كفى الآن يا رب، خذ نفسي. كان مرهق وجعان ووحيد.
الجميل في القصة إن ربنا ما لامهوش. سابه ينام، وبعتله ملاك بأكل وميه، وبعد ما استرد صحته كلمه. ربنا بدأ بالجسم قبل الكلام.
والوقاية هنا، نوم كفاية، أكل منتظم، وما تبقاش لوحدك لما تتعب. لو حسيت إنك مرهق نفسيًا، ده وقت تتصل بحد مش وقت تعزل نفسك.
٣: وقت الفراغ والمكان الغلط
إيه اللي بيحصل؟ الفراغ والأماكن القديمة والناس القديمة بتفتح الباب. (خطوة أولى عليا) الانتكاسة غالبًا بتبدأ بقرار صغير: هعدي من هناك، هشوف فلان.
زي داود (صموئيل التاني ١١). النص بيبدأ بجملة مهمة: كان وقت خروج الملوك للحرب، وأما داود فأقام في أورشليم. كل الناس في شغلها وهو قاعد. من فوق السطح شاف اللي ما كانش المفروض يبص عليه، ومن هناك سلسلة من القرارات الغلط بدأت.
بس داود برضه رجع وتاب، وكتب مزمور ٥١، وهو من أصدق صلوات التوبة في الكتاب.
والوقاية هنا جدول يوم فيه شغل ورياضة وخدمة وناس، وخطة جاهزة لأوقات الفراغ. وحدد الأماكن والأشخاص اللي لازم تبعد عنهم.
٤: الحنين للماضي
إيه اللي بيحصل؟ الواحد يفتكر الأيام الحلوة بس، وينسى الخسارة. كان فيه أيام حلوة، كنت مرتاح وقتها.
زي بني إسرائيل (عدد ١١:٥). طلعوا من العبودية، وبعد فترة في الصحرا قالوا: تذكرنا السمك الذي كنا نأكله في مصر مجانًا، والقثاء والبطيخ والكرات والبصل والثوم. افتكروا الأكل ونسيوا الطوب والسخرة. الذاكرة اختارت الحلو بس.
و امرأة لوط (تكوين ١٩:٢٦) اتلفتت ورا. ويسوع نفسه قال: اذكروا امرأة لوط (لوقا ١٧:٣٢).
وهنا الوقاية: اكتب ليه بطلت، بالتفصيل، وخساريك الحقيقية. واقرا الورقة دي لما الحنين يزورك.
٥: البيت الفاضي
في (متى ١٢:٤٣-٤٥): يسوع شبه الواحد ببيت اتنضف واتزين، بس فضل فاضي. اللي طلع منه رجع لقاه فاضي، فجاب معاه ناس أسوأ منه ودخلوا.يعني مش كفاية تشيل العادة القديمة. لو سبت مكانها فاضي، هترجع. محتاج تملا الحياة بحاجات جديدة.
وهنا الوقاية: شغل وهوايات ورياضة وخدمة وصحبة كويسة وصلاة وقراءة. وقتك المليان بالحاجات الكويسة مفيهوش مكان للقديم.
٦: الكسوف والاختباء
الواحد يغلط غلطة صغيرة، فيتكسف ويخبي، ويبعد عن الناس والعلاج. والسر بيكبر المشكلة. وساعات الكسوف نفسه هو اللي بيوصل للانتكاسة الكاملة.
زي آدم وحواء (تكوين ٣:٨-٩). بعد ما غلطوا استخبوا بين الشجر. وربنا نادى على آدم: أين أنت؟. مش عشان ما يعرفش، عشان يرجعهم. الاختباء كان رد فعلهم، والندا كان من ربنا.
وهنا الوقاية: اعترفوا بعضكم لبعض (يعقوب ٥:١٦). قول لشخص بتثق فيه بدري، قبل ما الموضوع يكبر. و إن اعترفنا بخطايانا فهو أمين وعادل حتى يغفر لنا (١ يوحنا ١:٩).
الوقاية بشكل عملي
مفيش وصفة سحرية، بس فيه حاجات بتفرق فعلاً:
متابعة منتظمة مع الدكتورأو المعالج، حتى لو الأمور تمام.
خطة طوارئ مكتوبة: مين أكلمه؟ وأروح فين لما الرغبة تشتد عليا؟ اكتب الأسماء والأرقام.
تجنب المحفزات: أماكن وناس ومواقف وأدوات عارف إنها بتجرك.
روتين صحي: نوم وأكل ورياضة.
صحبة داعمة وجروب تعافي (الزمالة). اثنان خير من واحد... لأنه إن وقع أحدهما يقيمه رفيقه (جامعة ٤:٩-١٠). والحديد بالحديد يحدّد (أمثال ٢٧:١٧).
حياة روحية: صلاة وقراءة وجماعة. اسهروا وصلّوا لئلا تدخلوا في تجربة (متى ٢٦:٤١).
وفيه وعد مهم: لم تصبكم تجربة إلا بشرية، ولكن الله أمين... سيجعل مع التجربة أيضًا المنفذ لتستطيعوا أن تحتملوا (١ كورنثوس ١٠:١٣).
وافتكر هروب يوسف (تكوين ٣٩:١٢)
لما اتعرض لإغراء، يوسف ما قعدش يناقش ولا يختبر قوته. ترك ثوبه في يدها وهرب وخرج. الهروب هنا مش جبن، ده قرار شجاع. أحيانًا أحسن دفاع إنك تمشي.
هاقوم بعد ما أقع
بطرس (لوقا ٢٢ ويوحنا ٢١)
بطرس قال ليسوع: أنا مستعد أمضي معك حتى إلى السجن وإلى الموت. وبعد ساعات أنكره ٣ مرات. وبعدين سمع الديك وبكى بمرارة.
لكن الحلو في القصة حاجتين:
قبل ما يقع، يسوع قاله: طلبت من أجلك لكي لا يفنى إيمانك (لوقا ٢٢:٣٢). كان عارف إنه هيقع، وكان بيصلي له من قبلها.
بعد القيامة، يسوع قابله على البحيرة وسأله ٣ مرات: أتحبني؟. ٣ مرات زي ٣ مرات الإنكار، وكل مرة رجعه خطوة، وفي الآخر قاله: ارعَ خرافي. السقطة ما منعتش بطرس من الدعوة.
الابن الضال (لوقا ١٥:١١-٢٤)
الابن طلب نصيبه، وسافر بعيد، وضيع كل حاجة، وجاع لحد ما اشتغل يرعى خنازير. وبعدين الكتاب بيقول جملة جميلة: فرجع إلى نفسه. ده كان أول خطوة.
قرر يرجع، وهو مستعد إن أبوه يرفضه أو يعامله كخدام. لكن الأب رآه وهو بعيد... فركض ووقع على عنقه وقبّله. الأب كان مستني، وجري عليه قبل ما الابن يكمّل كلامه.
متنساش، ربنا مش مستني منك تتحسن الأول وبعدين ترجع. ارجع زي ما إنت.
طب لو حصلت انتكاسة
ما تخبيش ولا تلوم نفسك لوم يدمرك.
كلم معالجك في أقرب وقت.
ابعد على طول عن المكان والناس المرتبطين بالتعاطي.
ارجع لخطة العلاج وجلسات الدعم.
اسأل: إيه اللي حركها؟ وخليها درس للوقاية. (أسباب الانتكاسة)
خليك فاكر بعد فترة توقف، تحمل الجسم بيقل. الرجوع بنفس الكمية القديمة ممكن يسبب جرعة زايدة خطيرة. لو فيه أي شك، اطلب مساعدة طبية على طول.
الانتكاسة مش آخر الكلام. شمشون رجع لربنا، وداود تاب، وبطرس اترد، والابن الضال لقى أبوه مستنيه. والدعم متاح ليك لو وقعت.
